Act 12 | TPZ | STEP | Manih po poen pamëh e Hëërot a teß susun po Jiuß to vakmis ko miröß a ma pöh teß va po vaman.

Acts 12

A Napan Va Po Vaman To Kon Kamis

1 Manih po poen pamëh e Hëërot a teß susun po Jiuß to vakmis ko miröß a ma pöh teß va po vaman. 2 Eß to heß a soe, kee ip vamët ee pe Jëmis e kea pe Jon po rapis rë. 3 E Hëërot to ep in a tah pamëh no o Jiuß to iu ne, pareß heß en pa soe vaonöt pa öt e Pitaß. A tah vëh to se tanok po Poen Apuh no o Jiuß to ënëën ne a taëën hikto is. 4 E Hëërot to öt e Pitaß, ko vanö en peß pa iuun nohnoh, ka taanaß vakum teß utut to teß ne, ka taanaß teß to ut ne poë. Manih komön o pöh poen, nee to vapapanih ne murin a tönim me a paeh aoaß to oah. E Hëërot to koman non a ö neß se vateß e Pitaß po vahutët pa ö no Poen Apuh po Jiuß to ënëën ne a taëën hikta is se hik. 5 E Pitaß to teß non pa iuun nohnoh, ko teß utut ut e ne peß nën. Ivëhkëk, a napan va po vaman to hinhin vatëh e ne pe Sosoenën se vaßaus e Pitaß.

E Pitaß To Këh A Iuun Nohnoh

6 O poen momoaan in a ö ne Hëërot a teß sunön po Jiuß se vateß e Pitaß po vahutët, e Pitaß to koroh non topnin in a poa teß utut. Eß to nohtöön non po pöök uris eh, ka ma meh teß utut teß ne po hopaß to ut ne. 7 Ka varuß vakomanih a ankeroß pe Sosoenën to tavus en koman iuun nohnoh, ko ëman kopös en pa ö ne Pitaß to teß non. Ka ankeroß pamëh kunkuin en pe Pitaß, pareß taß poan, “Sun vëvëhöß ah.” Ko uris eh vëh to nohtöön non e Pitaß to taihan këh en pa koren e Pitaß. 8 Ka ankeroß soe ke Pitaß pan, “Voh o voh parën ohop a suß pën.” Ke Pitaß nok va en nën, keß soe ke poan pan, “Ohop o ohop rë pën ko vatet maß neoß.” 9 Ke Pitaß vatet tavus en peß këh a iuun nohnoh to hikta nat non pa tah no a ankeroß to nonok non manih peß, eß teß man e non, keß, ahik. Eß to koman non pan, eß to tata non. 10 Eß Pitaß pen a ankeroß to oah ee pa poa teß utut to ut ne o hopaß vamomoaan, pare öök ee ko oah ee pa meh poa teß utut to ut ne o vapöök hopaß, ko öök ee po matön hopaß eh vëh to taperet no na pa vöön apuh. Ko hopaß pamëh taperet koman en, kee tavus ee. Ee pon to nönö vaßpeh nö e ne hanan, ka ankeroß pamëh këh en pe Pitaß ko nö en.

11 Ko kokoman pe Pitaß to maaka keß nat hah en pa ma tah to tanok manih peß, keß soe pan, “Eöß to nat rakah eoß, e Sosoenën to vanö vu maß a ankeroß peß keß vatvus hah këh a neoß pa koren e Hëërot, me a ma tah no a napan va Jiutiaß to koman ne a nok manih peöß.” 12 E Pitaß to maaka en pa ö neß to tavus a maß, ko nö en manuh pa iuun pe Mariaß, e sinan e Jon Mak. A nap peo rakah to teß ne pa iuun pamëh to hinhin ne. 13 E Pitaß to tekteok po hopaß, ka pah köövo kikiu nö maß pa peret o hopaß, a ëhnaneah e Rodaß. 14 Eß to tënan inan maß e Pitaß, pareß vaeö rakah ko hah en pa soe vanat raoe to hikta peret o hopaß. Eß to nö, pareß soe pan, “E Pitaß e vöh mahën.” 15 Ee varuh koman iuun to soe ke poë pan, “Eën to piuk eom.” Ivëhkëk, eß to eh rakah en, pareß soe pan, “Pöh man rakah, e Pitaß e vöh mahën.” Kee soe ke poë pan, “Eß a apen Pitaß nën to ep nom.”

16 Ivëhkëk, e Pitaß to tekteok avoeß e no maß po hopaß, ivëh, kee peret ko ep ee pe Pitaß, ko pah vuksean rakah ee. 17 Ke Pitaß vuhvuh maß raoe pa koreneah, pan ee se vatotomin. Ivëh, keß vahutët ken pee pa ö ne Sosoenën to vaßaus va in poan, keß tavus këh a iuun nohnoh. E Pitaß to soe ke raoe pan, “Soe ke Jëmis, me a ma meh kea pa tah vaßih.” E Pitaß to tavus këh en pee, pareß nö ke en pa meh vöön.

18 Pa pöstakah po meoh poen o teß utut to vuksean, ko karë rakah ko tok rakah ee pa ö ne Pitaß to koe, pare me vavaiu vah e Pitaß, ko vaiihi e ne pan, “E Pitaß koe nih?” 19 E Hëërot to taß o teß utut pa vaiu e Pitaß, ivëhkëk, ee to hikta ep in e Pitaß. Ivëh, ke Hëërot vateß en po teß utut varih to ut vahat voh ne pe Pitaß po vahutët. Eß to vaonöt en pa ö nee se ip vamët raoe. Vasuksuk e Hëërot to këh en pa muhin Jiutiaß ko nö en pa vöön va Sisariaß.

E Hëërot To Mët En

20 E Hëërot a teß sunön va pa muhin Jiutiaß to heve rakah non a napan va pa vöön va Taëaß me pa vöön va Saëdon, a poa vöön poë varih ne Hëërot to hikta matop non. Ka napan vatönun, pare nö maß pa vakamöß hah me e Hëërot. Ee to iu vakum me ne e Hëërot. Ivëh, kee nö momoaan ee manuh pe Blastus, a teß to matop non a iuun pe Hëërot, pan eß se vaßaus raoe pa vamatop o vaato pee me e Hëërot. Ee to vakamöß hah me e Hëërot, pare taneo ee pa kon hah a taëën manuh pa muhin ne Hëërot to matop non.

21 Ke Hëërot vateß en po pöh poen, po poen pamëh neß to ohop a ma ohop vih pa teß sunön, pareß ihoß koman en pa ö ihihoß peß, peß a teß sunön, ko heß a soe apuh manih pa ma napan. 22 Ka ma napan taoa maß, ko soe maß pan, “Eß hikta teß akuk non ivëh, to vavaato non, ahik, eß a sosoenën.” 23 Ka varuß vakomanih a ankeroß pe Sosoenën to heß mët en pe Hëërot, ka mët hat kon en peß, suk eß to hikta kë non a ëhnan e Sosoenën. Ko ves ëën poë, keß mët en.

24 Ivëh, ka ma napan kon ee pa soe pe Sosoenën pa ma vöön kurus.

25 E Banabas pen Söl to vahik a kiu pee manih Jerusalëm, pare hah ee manuh vöön va Antiök. Ee to nö vaßpeh me ee pe Jon Mak.